Մամուլի հաղորդագրություններ
Նախագահ Սերժ Սարգսյանը հանդիպում է ունեցել «Հայաստանի համայնքների միության» վարչության ներկայացուցիչների հետ
Նախագահ Սերժ Սարգսյանը, «Հայաստանի համայնքների միություն» կազմակերպության 15-ամյակի կապակցությամբ, այսօր հանդիպում է ունեցել միության վարչության ներկայացուցիչների հետ:
Հանրապետության նախագահը շնորհավորել է միության ներկայացուցիչներին՝ կազմակերպության հոբելյանի առթիվ, ընդգծել համայնքների ցանկությամբ ձևավորված և հեղինակություն վայելող այդ ինքնուրույն կառույցի կարևորությունը, մաղթել նորանոր հաջողություններ:
Հանդիպման ժամանակ «Հայաստանի համայնքների միության» վարչության անդամները Նախագահի հետ զրուցել են իրենց հետաքրքրող մի շարք հարցերի՝ ապակենտրոնացման քաղաքականության շարունակականության և այդ գործընթացի զարգացման հնարավորությունների, համայնքներին փոխանցված բազմաթիվ նոր լիազորությունների արդյունավետության, տեղական կարողությունների զարգացումը խթանելու ուղղությամբ հետագա ծրագրերի և մոտեցումների, գյուղական ու հատկապես փոքր համայնքների հետ կապված խնդիրների և ՏԻՄ ոլորտին առնչվող մի շարք այլ թեմաների շուրջ:
Սերժ Սարգսյանը հանդիպման մասնակիցներին շնորհավորել և բարեմաղթանքներ է հղել նաև գալիք տոների կապակցությամբ:
«Հայաստանի համայնքների միություն» իրավաբանական անձանց միությունը, որին անդամակցում են ՀՀ քաղաքային, գյուղական և Երևանի բազմաթիվ թաղային համայնքներ, հանդես է գալիս որպես տեղական ինքնակառավարման մարմինների շահերի ներկայացուցիչ՝ ՀՀ կառավարության հետ համատեղ մասնակցելով ՏԻՄ ոլորտին վերաբերող օրենսդրական փոփոխությունների, բարեփոխումների ծրագրերի մշակմանն ու օրենսդրական նախագծերի միջազգային փորձաքննության կազմակերպմանը, ներկայացնում համայնքների միասնական ձայնը Հայաստանում և Հայաստանից դուրս: