Մամուլի հաղորդագրություններ
Նախագահ Վահագն Խաչատուրյանը հրաժեշտի հանդիպում է ունեցել արքեպիսկոպոս Ժոզե Ավելինո Բեթենկուրի հետ
Հանրապետության նախագահ Վահագն Խաչատուրյանը հրաժեշտի հանդիպում է ունեցել Հայաստանում Սուրբ աթոռի առաքելական նվիրակ, արքեպիսկոպոս Ժոզե Ավելինո Բեթենկուրի հետ:
Ողջունելով հյուրին նախագահը շնորհակալություն է հայտնել նվիրակին առաքելության ընթացքում իրականացրած գործունեության համար:
«Ցանկանում եմ անձամբ Ձեզ շնորհակալական խոսքեր հղել Հայաստանի և Վատիկանի հարաբերությունների զարգացման համար, նաև Ձեր անձնական ջանքերի շնորհիվ մենք միշտ զգացել ենք Հռոմի պապի և կաթոլիկ եկեղեցու աջակցությունը»,- նշել է նախագահ Խաչատուրյանը:
Արքեպիսկոպոս Ժոզե Բեթենկուրը շնորհակալություն հայտնելով ընդունելության և ջերմ խոսքերի համար նշել է, որ իր համար մեծ ուրախություն էր այս տարիներին գտնվել Հայաստանում և գործել ի նպաստ Վատիկանի և Հայաստանի հարաբերությունների սերտացման:
Հանդիպման ընթացքում անդրադարձ է կատարվել տարածաշրջանային իրողություններին և Լեռնային Ղարաբաղից բռնի տեղահանված ավելի քան հարյուր հազար հայերի իրավունքների պաշտպանության և հումանիտար խնդիրներին:
Հանրապետության նախագահն արքեպիսկոպոսի ուշադրությունն է հրավիրել Լեռնային Ղարաբաղի տարածքում հայկական և քրիստոնեական հազարամյա մշակութային ժառանգության պաշպանության խնդիրների վրա և շեշտել, որ միայն առաջադեմ հանրության, կազմակերպությունների ու նաև Սուրբ աթոռի գործուն քայլերի շնորհիվ հնարավոր կլինի խուսափել այդ հուշարձանների նկատմամբ վայրագություններից և հնարավոր ոչնչացումից: