Մամուլի հաղորդագրություններ
Մանկավարժական գիտությունների թեկնածու, դոցենտ Լավրենտի Միրզոյանին է հանձնվել Մովսես Խորենացու մեդալը
Հայաստանի Հանրապետության նախագահ Վահագն Խաչատուրյանի հրամանագրով մանկավարժական գիտությունների թեկնածու, դոցենտ Լավրենտի Միրզոյանն պարգևատրվել է Մովսես Խորենացու մեդալով՝ Մայրենի լեզվի պահպանման և զարգացման գործում ներդրած ավանդի համար:
Պետական բարձր պարգևն այսօր Հանրապետության նախագահ Վահագն Խաչատուրյանի խորհրդական Վահրամ Դումանյանը հանձնել է Լավրենտի Միրզոյանին: «Սա Ձեր վաստակի համեստ գնահատականն է: Մենք շատ հպարտ ենք Ձեզնով: Դուք Հայոց լեզվի, մեր մշակութային ավանդույթների պահապանն ու զարգացնողն եք: Շնորհավորանքի և լավագույն բարեմաղթանքների խոսքեր ենք փոխանցում անձամբ նախագահ Վահագն Խաչատուրյանի կողմից»,- նշել է Վահրամ Դումանյանը:
Լավրենտի Միրզոյանը շնորհակալություն է հայտնել իր գործունեությունը նման բարձր գնահատականի արժանացնելու համար և ընդգծել, որ երբևէ մեդալի կամ շքանշանի համար չի աշխատել, այլ փորձել է «իր պարտքը կատարել՝ որպես Հայաստանի Հանրապետության քաղաքացի»: «Շնորհակալ եմ, որ գնահատեցիք իմ տարիների վաստակը»,- նշել է Լավրենտի Միրզոյանը: