Նախագահ Սարգսյանը շնորհավորական ուղերձ է հղել Կատարի Պետության հայր Էմիր, շեյխ Համադ Բին Խալիֆա Ալ Թանիին՝ երկրի ազգային տոնի առթիվ

Կատարի Պետության Ազգային տոնի առթիվ Հանրապետության նախագահ Արմեն Սարգսյանը շնորհավորական ուղերձ է հղել Կատարի Պետության հայր Էմիր, շեյխ Համադ Բին Խալիֆա Ալ Թանիին:

Ուղերձում մասնավորապես ասվում է.

«Անգնահատելի է Ձեր ուրույն դերակատարումը Կատարի հաջողությունների և միջազգային ասպարեզում երկրի հեղինակության բարձրացման գործում:

Խորին երախտագիտություն եմ հայտնում Կատար կատարած այցի ընթացքում Ձեր ցուցաբերած ջերմ ընդունելության համար:

Տպավորված եմ մեր հանդիպմամբ և բովանդակալից զրույցով, որն ինձ համար մեկ անգամ ևս բացահայտեց պետական մտածողությամբ հզոր գործչին և հարուստ ներաշխարհով անհատին: Այն հիանալի առիթ էր՝ քննարկելու երկու երկրների միջև հարաբերությունների զարգացման հեռանկարները և տարածաշրջանային հարցերը:

Վստահ եմ, որ համատեղ ջանքերի շնորհիվ երկկողմ հեռանկարային համագործակցությունն առավել կամրապնդվի և կընդլայնվի»։