Հայաստանի եւ Իտալիայի նախագահները հանդես են եկել մամուլի համար հայտարարություններով

Հայաստանի Հանրապետության եւ Իտալիայի Հանրապետության նախագահներ Արմեն Սարգսյանը եւ Սերջիո Մատարելլան հանդիպումների արդյունքներն ամփոփել են զանգվածային լրատվամիջոցների ներկայացուցիչների առջեւ հայտարարություններով:

***
Նախագահ Արմեն Սարգսյանի հայտարարությունը

Մեծարգո՛ պարոն Նախագահ Մատարելլա,

Տիկնա՛յք եւ պարոնա՛յք,

Հարգելի՛ գործընկերներ,

Մեկ անգամ եւս սրտանց ողջունում եմ ձեզ Երեւանում՝ Հայաստանի Հանրապետությունում:

Ուզում եմ գոհունակությամբ նշել, որ նախագահ Մատարելլայի հետ մեր զրույցն ընթացավ ջերմ մթնոլորտում։ Բովանդակալից քննարկում ունեցանք հայ-իտալական համագործակցության լայն օրակարգի շուրջ։

Վերահաստատեցինք միջպետական հարաբերություններն ամրապնդելու մեր հանձնառությունը:

Համաձայնեցինք, որ պետք է լրացուցիչ ջանքեր ներդնել հայ-իտալական գործակցությանը նոր դինամիկ զարգացում հաղորդելու ուղղությամբ՝ ինչպես երկկողմ ֆորմատով, այնպես էլ միջազգային հարթակներում, այդ թվում՝ նաեւ Հայաստան-Եվրամիություն գործընկերության շրջանակներում:

Արձանագրեցինք, որ Իտալիան, ընթացիկ տարում լինելով նաեւ ԵԱՀԿ նախագահող երկիր, կշարունակի աջակցել Լեռնային Ղարաբաղի հիմնահարցի կարգավորման միակ միջազգային ձեւաչափին՝ ԵԱՀԿ Մինսկի խմբի համանախագահությանը:

Անդրադարձանք Հայաստան-Եվրամիություն գործընկերությանը։ Սա եւս մի ուղղություն է, որտեղ հայ-իտալական հարաբերությունները խորացնելու մեծ հեռանկարներ կան։ Այս առնչությամբ հույս հայտնեցի, որ Իտալիան նույնպես շուտով կվավերացնի Համապարփակ եւ ընդլայնված գործընկերության համաձայնագիրը։

Երկկողմ համագործակցության կայուն զարգացման համատեքստում կարեւորեցինք նաեւ երկու երկրների միջեւ առկա իրավապայմանագրային դաշտի լիարժեք օգտագործումը, որն ընդգրկում է երեք տասնյակից ավելի իրավական փաստաթուղթ։

Արձանագրեցինք տնտեսական, գործարար, մշակութային եւ գիտակրթական կապերի ընդլայնման եւ խորացման անհրաժեշտությունը, ինչպես նաեւ մարդկային շփումների կարեւորությունը:

Կարեւորելով մշակութային ժառանգության պահպանության հարցը՝ մեր համագործակցությունն էլ ավելի մեծ թափ կստանա վաղը Երեւանում բացվող հայ-իտալական մշակութային ժառանգության պահպանման կենտրոնի շնորհիվ:

Վստահ եմ, որ պարոն նախագահի պետական այցն ամուր հիմքեր կստեղծի հայ-իտալական քաղաքական երկխոսությունն եւ բազմաոլորտ համագործակցությունը որակական նոր մակարդակի բարձրացնելու համար։

Շնորհակալություն:

***
Նախագահ Սերջիո Մատարելլայի հայտարարությունը
 

Ցանկանում եմ իմ խորին շնորհակալությունը հայտնել նախագահ Սարգսյանին, ում եւս մեկ անգամ ջերմորեն շնորհավորեցի վերջին ամիսներին այս բարձր պաշտոնը ստանձնելու կապակցությամբ եւ կցանկանայի իմ երախտագիտությունը հայտնել նրան, հայկական հաստատություններին եւ հայ ժողովրդին՝ ինձ եւ ինձ ուղեկցող պատվիրակությանը ցուցաբերած այսքան ջերմ ընդունելության համար:
Իսկապես շատ ուրախ եմ կատարել Իտալիայի նախագահի՝ այս երկիր երբեւէ կատարած առաջին այցը այսչափ նշանակալից հանգամանքներում, ինչպիսիք են Հայաստանի Առաջին Հանրապետության հարյուրամյակը եւ Երեւանի հիմնադրման 2800-ամյակը:

Այս այցը կատարելու իմ ցանկությունը մեծ էր, եւ չափազանց ուրախ եմ այցի համար՝ հաշվի առնելով մեր ժողովուրդների միջեւ առկա հնամենի կապերը եւ մեզ միավորող վստահության եւ բարեկամության հարաբերությունները: Վստահ եմ, որ այս առիթը մեզ հնարավորություն կտա էլ ավելի ամրապնդելու մեր գերազանց համագործակցությունը եւ խորը բարեկամությունը:

Այս կապի մասին են վկայում հաճախակի տեղի ունեցող հանդիպումները, փոխանակումները, բազմաթիվ ոլորտներում համագործակցությունը, եւ դրա լավագույն խորհրդանիշն է մեր զինված ուժերի համատեղ հանձնառությունը Լիբանանում՝ երկու երկրների համար էլ բարեկամ երկրում, խաղաղության եւ կայունության համար, ինչպես նաեւ այլ երկրներում, օրինակ՝ Աֆղանստանում:

Նախագահ Սարգսյանի հետ քննարկել ենք մեր գերազանց երկկողմ հարաբերությունները եւ բավարարված ենք այդ հարաբերությունների աճող ինտենսիվությամբ եւ որակով:

Մեր երկկողմ հարաբերությունները մշակույթի ոլորտում արտացոլում են մեր բարեկամության առանձնապես խորը բնույթը:

Մենք շատ գոհ ենք համագործակցության ձեռք բերված մակարդակից, որին նպաստում են մեզ միավորող հազարամյակների պատմություն ունեցող շփումները եւ Իտալիայում հայկական սփյուռքի ներդրումը, որը բոլոր ժամանակաշրջաններում ունեցել է եւ այսօր էլ ունի որակապես բարձր հատկանիշներով օժտված բազում ներկայացուցիչներ:

Մեր հարաբերությունների՝ հատկապես մշակութային, հնագիտական եւ գիտական ոլորտներում կենսունակության մասին են վկայում նաեւ մի շարք նշանակալից ծրագրեր, որոնց կյանքի կոչմանն ուղղված աշխատանքները հասունացել են հենց այս այցի նախապատրաստման ընթացքում. ի նկատի ունեմ Մշակութային ժառանգության պահպանության տարածաշրջանային կենտրոնը, որի պաշտոնական բացումը վաղը պատիվ կունենամ իրականացնել Նախագահ Սարգսյանի հետ Ազգային պատկերասրահում: Մենք շատ ուրախ ենք, որ այս նախաձեռնության շնորհիվ կկարողանանք փոխանցել այս ոլորտում Իտալիայի ունեցած փորձը, եւ հուսով ենք, որ կենտրոնը կարեւոր տեղ կզբաղեցնի հայ եւ ողջ տարածաշրջանի մշակութային ժառանգության արժեւորման գործում:

Երեւանի դպրոցներից մեկում բացվելու է նաեւ երկլեզու՝ հայերենով եւ իտալերենով ուսուցման բաժին, եւ այս կապակցությամբ վստահեցրեցի Նախագահ Սարգսյանին, որ մեր երկրից իտալերենի ուսուցիչ կգործուղվի՝ սկսած հենց գալիք ուսումնական տարուց:

Իր գործունեությունն է սկսելու նաեւ «Դանթե Ալիգիերի» կենտրոնի երեւանյան կոմիտեն, դրան կավելանա նաեւ Իտալական հետազոտությունների ազգային կենտրոնի եւ Հայաստանի գիտության եւ կրթության նախարարության Գիտության կոմիտեի միջեւ գիտատեխնիկական համագործակցության վերաբերյալ փոխըմբնման հուշագրի ստորագրումը:

Նախագահ Սարգսյանի հետ ընդգծեցինք գիտական համագործակցության կարեւորությունը: Հուսով եմ, որ այն էլ ավելի կզարգանա, հատկապես աստղաֆիզիկայի կենտրոնների միջազգային ցանցի եւ մեր երկրների համալսարանների միջեւ գիտաշխատողների շարժունակության ծրագրերի շրջանակներում:

Նախագահ Սարգսյանի հետ կանգ առանք նաեւ առեւտրատնտեսական հարաբերություններում առկա փոխլրացման հարցերին, ինչը ներկայացնում է մեր համագործակցության համար մեծ հնարավորություններ: Հայաստանում արդեն իսկ գործում են որոշ իտալական ընկերություններ, կան ընկերություններ, որոնք հետաքրքրություն են ցուցաբերում. այդ հետաքրքրությունը շատ մեծ է ինչպես երկկողմ համագործակցության առումով, այնպես էլ պայմանավորված այն դերով, որ Հայաստանը կարող է ունենալ ավելի ընդարձակ տարածաշրջանում:

Նախագահ Սարգսյանին հաղորդեցի, եւ վաղը կհաղորդեմ նաեւ Վարչապետին, իտալական ընկերությունների՝ իրենց լավագույն փորձը, know how-ն, ինչպես նաեւ այն տարածաշրջանների, որտեղ այդ ընկերությունները գործունեություն են ծավալում, տնտեսական հյուսվածքին ինտեգրվելու իրենց կարողությունները փոխանցելու ամբողջական պատրաստակամության մասին:

Լեռնային Ղարաբաղի թեմայի վերաբերյալ նախագահ Սարգսյանին հայտնեցի այն մասին, որ Իտալիան՝ նաեւ որպես ԵԱՀԿ նախագահող, ինչի իրագործումը վերապահված է այստեղ ներկա Արտաքին գործերի նախարարին, մեծ կարեւորություն է տալիս կայուն եւ տեւական լուծում որոնելուն:

ԵԱՀԿ-ում այս նախագահության ընթացքում Իտալիան մտադիր է խթանել եւ նպաստել հակամարտության վտանգի տակ գտնվող բոլոր իրավիճակների համար նոր բանակցային ուղիների վերագործարկմանը՝ ի նպաստ ԵԱՀԿ տարածքում անվտանգության եւ կայունության:

1975 թվականին, Հելսինկյան կոնֆերանսից եւ նրա սկզբունքներից սկսած, Եվրոպան բռնեց խաղաղ համակեցություն, կայունություն եւ համագործակցություն ապահովելու դժվարին, հաճախ հակասությունների հետ բախվող ուղին. դրանք են ԵԱՀԿ գործունեության նպատակները:

Լեռնային Ղարաբաղի վերաբերյալ մենք հաստատեցինք, թե որքան հաճախ են անմիջական շփումները օգտակար եղել լարվածությունը մեղմելու եւ բանակցությունները շարունակելու հնարավորությանն ընթացք տալու հարցում:
Հետեւաբար ակնկալում ենք, որ բոլորի կողմից կլինի նոր քաղաքական կամք հակամարտությանը վերջ դնելու եւ ոչ թե ռազմական, այլ քաղաքական, տեւական, կայուն եւ գոհացնող լուծում գտնելու համար:

Մենք աջակցել ենք եւ շարունակում ենք աջակցել Մինսկի խմբի համանախագահների միջնորդությանը՝ ուղղված հակամարտության խաղաղ լուծմանը՝ համընդհանուր ճանաչված հիմնարար սկզբունքների վրա, եւ ակնկալում ենք բանակցությունների դրական արդյունքներ:

Իտալիան մեծ ուրախությամբ է ողջունել Հայաստանի եւ Եվրամիության միջեւ Համապարփակ եւ ընդլայնված գործընկերության համաձայնագրի ստորագրումը: Մենք համարում ենք, որ այս համաձայնագիրը շատ օգտակար հարթակ է Հայաստանի եւ Եվրամիության միջեւ հետագա շահավետ եւ ներդաշնակ հարաբերությունների խորացման համար, որոնք կուղղորդեն դեպի մեր ժողովուրդների բարգավաճում եւ զարգացում՝ երկու կողմերի առաջնահերթությունների եւ կարիքների հարգմամբ:

Վստահեցրեցի Նախագահ Սարգսյանին, եւ այժմ էլ վստահեցնում եմ, որ մեր հաստատությունների կողմից կցուցաբերվի առավելագույն ուշադրություն համաձայնագրի վավերացման գործընթացին:

Հայաստանի եւ Իտալիայի միջեւ բարեկամությունը հնամենի է եւ խորը, եւ, ինչպես կարելի է արձանագրել համագործակցության բազմաթիվ ուղղություններից, այն ապագայում էլ միտված է հետագա զարգացման: