Լրատվություն
Մամուլի հաղորդագրություններ
17
06, 2009
Նախագահ Սերժ Սարգսյանի ողջույնի խոսքը Սիրիայի Նախագահ Բաշար ալ-Ասադի եւ տիկին Ասմա ալ-Ասադի պատվին պաշտոնական ընթրիքի ժամանակ
ՀՀ Նախագահ Սերժ Սարգսյանի ողջույնի խոսքը Սիրիայի Արաբական Հանրապետության Նախագահ Բաշար ալ-Ասադի եւ տիկին Ասմա ալ-Ասադի պատվին պաշտոնական ընթրիքի ժամանակ
Մեծարգո պարո՛ն Նախագահ,
Մեծարգո տիկի՛ն Ասմա ալ Ասադ,
Հարգարժան տիկնա՛յք եւ պարոնա՛յք,
Ինձ համար առանձնահատուկ հաճույք է ողջունելու բարեկամ Սիրիայի Նախագահին իր ազնվազարմ տիկնոջ հետ, ովքեր առաջին անգամ են այցելում Հայաստան:
Այսօր տեղի ունեցած բանակցությունների արդյունքները եւս փաստեցին, որ երկկողմ եւ միջազգային տարբեր խնդիրների շուրջ Հայաստանի Հանրապետության եւ Սիրիայի Արաբական Հանրապետության մոտեցումներն ու դիրքորոշումները համընկնում են:
Քաղաքական երկխոսությանը զուգընթաց նկատելի քայլեր են ձեռնարկվում տնտեսական հարաբերությունների աշխուժացման ուղղությամբ: Այսօր ստորագրված փաստաթղթերը, մեր պայմանավորվածությունները, ինչպես նաեւ վաղը բացվող գործարար համաժողովն իրենց նպաստը կբերեն երկկողմ տնտեսական կապերը քաղաքական հարաբերությունների մակարդակին հասցնելու մեր ջանքերին: Մեր երկրների գործարար շրջանակների միջեւ շփումների ակտիվացումն, անկասկած, կընդլայնի նաեւ երկկողմ առեւտրի ծավալն ու նոր որակ կհաղորդի նրա կառուցվածքին:
Տիկնա՛յք եւ պարոնա՛յք,
Հայաստանի եւ Սիրիայի ժողովուրդներին միմյանց կապում են դարերի խորքից եկող բարեկամությունը, պատմամշակութային ընդհանրությունները, հաճախ միանման ճակատագրերն ու հույզերը: Ապրելով կողք կողքի, մեր նախնիները միասնաբար հաղթահարել են բազմաթիվ փորձություններ, միմյանց օգնության ձեռք մեկնել դժվարին պահերին` ամրապնդելով անկեղծ բարեկամությունը: Հայ ժողովուրդը միշտ երախտագիտությամբ է հիշում այն հոգատար վերաբերմունքն ու աջակցությունը, որին Առաջին աշխարհամարտի ժամանակ պատմական Հայրենիքից բռնագաղթված նրա հազարավոր զավակներն արժանացան հյուրընկալ սիրիական հողում: Սիրիան ակամա դարձավ հայ ժողովրդի մեծ ողբերգության` Ցեղասպանության ականատեսը: Աշխարհում ո՞վ ավելի լավ գիտի, թե ինչ տառապանքների ենթարկվեցին հայրենազրկված հայերը, քան նրանց սիրիացի քույրերն ու եղբայրները, ովքեր գթասրտության ու մարդասիրության հրաշքներ գործեցին` փրկելով բազմաթիվ անմեղ կյանքեր: Միեւնույն ժամանակ Սիրիան դարձավ հայ ժողովրդի վերածննդի խորհրդանիշը: Ցեղասպանությունը վերապրած հայերն այստեղ կարողացան ոտքի կանգնել, վերագտնել երկրորդ հայրենիք եւ կառուցել նոր ապագա: Այսօր նրանց սերունդներն ապրում եւ արարում են Սիրիայում որպես նրա օրինապաշտ եւ լիիրավ քաղաքացիներ:
Գոհունակությամբ պետք է նշեմ, որ մեր ժողովուրդների ավանդական բարեկամության եւ միմյանց նկատմամբ տածած ջերմ եւ անկեղծ զգացումների հիման վրա ներկայումս հաջողությամբ զարգանում են հայ-սիրիական միջպետական հարաբերությունները եւ բազմաբնույթ փոխշահավետ համագործակցությունը:
Արաբական ասացվածքը խորհուրդ է տալիս. "Ընտրի՛ր ընկերոջդ ճանապարհից առաջ": Մեր ժողովուրդներն այս ընտրությունը վաղուց արդեն կատարել են, դարեր ու հազարամյակներ քայլել են միասին` կողք կողքի եւ դեռ շատ երկար են շարունակելու այդ ճանապարհը:
Տիկնա՛յք եւ պարոնա՛յք,
Այսօր մեր հայացքն ուղղված է ապագային: Չմոռանալով անցյալը` մենք ձգտում ենք մեր բոլոր հարեւանների հետ արդյունավետ համագործակցության` ի բարօրություն մեր երկրի, ողջ տարածաշրջանի, գալիք սերունդների, հանուն խաղաղության:
Թույլ տվեք մեր թանկագին հյուրերին` Սիրիայի Արաբական Հանրապետության Նախագահին եւ նրա տիկնոջը, մաղթել քաջառողջություն եւ հաջողություն, Սիրիայի բարեկամ ժողովրդին` խաղաղություն ու բարգավաճում, իսկ մեր պետություններին` նորանոր նվաճումներ համագործակցության բոլոր ասպարեզներում:
Խաղաղությու՛ն Սիրիային եւ խաղաղությու՛ն Հայաստանին:
Մեծարգո պարո՛ն Նախագահ,
Մեծարգո տիկի՛ն Ասմա ալ Ասադ,
Հարգարժան տիկնա՛յք եւ պարոնա՛յք,
Ինձ համար առանձնահատուկ հաճույք է ողջունելու բարեկամ Սիրիայի Նախագահին իր ազնվազարմ տիկնոջ հետ, ովքեր առաջին անգամ են այցելում Հայաստան:
Այսօր տեղի ունեցած բանակցությունների արդյունքները եւս փաստեցին, որ երկկողմ եւ միջազգային տարբեր խնդիրների շուրջ Հայաստանի Հանրապետության եւ Սիրիայի Արաբական Հանրապետության մոտեցումներն ու դիրքորոշումները համընկնում են:
Քաղաքական երկխոսությանը զուգընթաց նկատելի քայլեր են ձեռնարկվում տնտեսական հարաբերությունների աշխուժացման ուղղությամբ: Այսօր ստորագրված փաստաթղթերը, մեր պայմանավորվածությունները, ինչպես նաեւ վաղը բացվող գործարար համաժողովն իրենց նպաստը կբերեն երկկողմ տնտեսական կապերը քաղաքական հարաբերությունների մակարդակին հասցնելու մեր ջանքերին: Մեր երկրների գործարար շրջանակների միջեւ շփումների ակտիվացումն, անկասկած, կընդլայնի նաեւ երկկողմ առեւտրի ծավալն ու նոր որակ կհաղորդի նրա կառուցվածքին:
Տիկնա՛յք եւ պարոնա՛յք,
Հայաստանի եւ Սիրիայի ժողովուրդներին միմյանց կապում են դարերի խորքից եկող բարեկամությունը, պատմամշակութային ընդհանրությունները, հաճախ միանման ճակատագրերն ու հույզերը: Ապրելով կողք կողքի, մեր նախնիները միասնաբար հաղթահարել են բազմաթիվ փորձություններ, միմյանց օգնության ձեռք մեկնել դժվարին պահերին` ամրապնդելով անկեղծ բարեկամությունը: Հայ ժողովուրդը միշտ երախտագիտությամբ է հիշում այն հոգատար վերաբերմունքն ու աջակցությունը, որին Առաջին աշխարհամարտի ժամանակ պատմական Հայրենիքից բռնագաղթված նրա հազարավոր զավակներն արժանացան հյուրընկալ սիրիական հողում: Սիրիան ակամա դարձավ հայ ժողովրդի մեծ ողբերգության` Ցեղասպանության ականատեսը: Աշխարհում ո՞վ ավելի լավ գիտի, թե ինչ տառապանքների ենթարկվեցին հայրենազրկված հայերը, քան նրանց սիրիացի քույրերն ու եղբայրները, ովքեր գթասրտության ու մարդասիրության հրաշքներ գործեցին` փրկելով բազմաթիվ անմեղ կյանքեր: Միեւնույն ժամանակ Սիրիան դարձավ հայ ժողովրդի վերածննդի խորհրդանիշը: Ցեղասպանությունը վերապրած հայերն այստեղ կարողացան ոտքի կանգնել, վերագտնել երկրորդ հայրենիք եւ կառուցել նոր ապագա: Այսօր նրանց սերունդներն ապրում եւ արարում են Սիրիայում որպես նրա օրինապաշտ եւ լիիրավ քաղաքացիներ:
Գոհունակությամբ պետք է նշեմ, որ մեր ժողովուրդների ավանդական բարեկամության եւ միմյանց նկատմամբ տածած ջերմ եւ անկեղծ զգացումների հիման վրա ներկայումս հաջողությամբ զարգանում են հայ-սիրիական միջպետական հարաբերությունները եւ բազմաբնույթ փոխշահավետ համագործակցությունը:
Արաբական ասացվածքը խորհուրդ է տալիս. "Ընտրի՛ր ընկերոջդ ճանապարհից առաջ": Մեր ժողովուրդներն այս ընտրությունը վաղուց արդեն կատարել են, դարեր ու հազարամյակներ քայլել են միասին` կողք կողքի եւ դեռ շատ երկար են շարունակելու այդ ճանապարհը:
Տիկնա՛յք եւ պարոնա՛յք,
Այսօր մեր հայացքն ուղղված է ապագային: Չմոռանալով անցյալը` մենք ձգտում ենք մեր բոլոր հարեւանների հետ արդյունավետ համագործակցության` ի բարօրություն մեր երկրի, ողջ տարածաշրջանի, գալիք սերունդների, հանուն խաղաղության:
Թույլ տվեք մեր թանկագին հյուրերին` Սիրիայի Արաբական Հանրապետության Նախագահին եւ նրա տիկնոջը, մաղթել քաջառողջություն եւ հաջողություն, Սիրիայի բարեկամ ժողովրդին` խաղաղություն ու բարգավաճում, իսկ մեր պետություններին` նորանոր նվաճումներ համագործակցության բոլոր ասպարեզներում:
Խաղաղությու՛ն Սիրիային եւ խաղաղությու՛ն Հայաստանին: