Նախագահ Սարգսյանի ուղերձը Թուրքիայի նախագահ Էրդողանին. «Ներումը գալիս է ճանաչումից հետո»

Հանրապետության նախագահ Արմեն Սարգսյանը հոկտեմբերի 23-ին հարցազրույց է տվել Շվեյցարիայի հանրային հեռուստառադիոընկերությանը (RTS)։ Հեռուստաընկերությունը որոշ հատվածներ է հրապարակել հարցազրույցից. 

«Նոյեմբերի 11-ի արարողություններին ընդառաջ, որտեղ բազմաթիվ երկրների ղեկավարներ կնշեն Առաջին աշխարհամարտի հիշատակը, Հայաստանի նախագահ Արմեն Սարգսյանը հույս ունի, որ այդ իրադարձությունը առիթ կհանդիսանա «ճանաչելու» կամ «հիշելու 1915-1916-ին հայերի կրած ցեղասպանությունը»:

«Ես չգիտեմ, թե ինչպես կարելի է խոսել Առաջին համաշխարհային պատերազմի մասին առանց անդրադառնալու այն ողբերգությանը, որ տեղի է ունեցել 105 տարի առաջ և առանց խոսելու ցեղասպանության մասին: Երկրների ղեկավարների կողմից ճանաչումը կամ կոչը բարձր կգնհատվի իմ կողմից, Հայաստանի և ամբողջ հայ ժողովրդի կողմից»,- RTS-ին ասել է Արմեն Սարգսյանը:

«Հայոց ցեղասպանության ճանաչումը պարզապես մի ողբերգության ճանաչում չէ, որը վերաբերում է մեկ ժողովրդի: Նախ և առաջ դա 20-րդ առաջին, ամենամեծ ցեղասպանությունն է: Քանի որ այն չկանխվեց, ճանաչում ու դատապարտում չունեցավ, հետագայում ևս 20-րդ դարում ցեղասպանությունները կրկնվեցին»,-շարունակել է նախագահը:

Նրա ուղերձը Էրդողանին. «Ներումը գալիս է ճանաչումից հետո»

Թուրքիայի նախագահ Ռեջեփ Թայիբ Էրդողանին իր ուղերձի վերաբերյալ հարցին ի պատասխան Արմեն Սարգսյանն ասում է, թե պատրաստ է երկխոսության և հղում է անում իր քրիստոնեական համոզմունքներին: Նա չի բացառում, որ մի օր ներում կլինի, սակայն «ներումը գալիս է ճանաչումից հետո»: Նա գտնում է, որ այդ ճանաչումը պատմական ավելի լայն ընդգրկում կունենա, քանի որ հայոց ցեղասպանությունը «20-րդ դարի առաջին ցեղասպանությունն էր»:

«Ես նախ և առաջ կասեի Էրդողանին. «Բարի լույս, պարոն նախագահ: Կարծում եմ՝ մենք միասին քննարկելու հարց ունենք: Դու Թուրքիայի նախագահն ես, իսկ ես՝ Հայաստանի: Իմ ընտանիքը, իմ նախնիները Էրզրումից, Վանից ու Բիթլիսից են: Իմ հին ընտանիքը պատմություն ունի: Ինչո՞ւ չխոսենք Թուրքիայի ու Հայաստանի միջև հարաբերությունների մասին, ինչո՞ւ չխոսենք մեր անձնական պատմությունների մասին: Մենք պետք է խոսենք ոչ միայն պատմության, այլև ապագայի մասին՝ քո ու իմ երեխաների, թոռների ապագայի, մեր երկու ժողովուրդների մասին»: Ես քրիստոնյա եմ: Քրիստոնեությունը սովորեցնում է, որ միշտ կա ներելու հնարավորություն, սակայն ներողամտությունը միայն կարող է հաջորդել ճանաչմանը»,-ասել է նախագահ Սարգսյանը:

«Մեկ տարի հետո Մակրոնի հետ Փարիզում մեծ համերգ՝ նվիրված Ազնավուրին»

Հայաստանի նախագահը հայտնում է, որ պայմանավորվել է Էմանուել Մակրոնի հետ կազմակերպել բարեգործական մեծ համերգ Շառլ Ազնավուրի հիշատակին, «ըստ ամենայնի, 2019-ի հոկտեմբերին»: «Բազմաթիվ երգիչներ և դերասաններ կլինեն», ասում է նա՝ հիշելով, որ Էմանուել և Բրիջիտ Մակրոնի հետ Ազնավուր են երգել: «Ես և Էմանուել Մակրոնը մեր տիկինների հետ այցելեցինք Շառլ Ազնավուրի թանգարան և կեցավայր: Ես առաջարկեցի նախագահ Էմանուել Մակրոնին մեկ տարում կազմակերպել մեծ բարեգործական համերգ Փարիզում՝ ի հիշատակ Շառլ Ազնավուրի: Հուսով եմ, որ այդ համերգը կլինի 2019 թվականի հոկտեմբերին՝ ի հիշատակ Ազնավուրի: Դա պետք է լինի բարեգործական համերգ, որին կհրավիրվեն աշխարհահռչակ դերասաններ, երգիչներ»:

Հայաստանի նախագահը RTS-ին տված հարցազրույցում խոսել է նաև Հայաստանի ճկունության մասին: «Մեր երկիրը երիտասարդ է, նա գտնվում է Արեւելքի և Արևմուտքի միջև», ասել է նա»: