Նախագահ Սարգսյանը մասնակցել է "Շանհայ-Էքսպո-2010" համաշխարհային ցուցահանդեսի բացման արարողությանը

Չինաստանի Ժողովրդական Հանրապետության Նախագահ Հու Ձինթաոյի հրավերով Նախագահ Սերժ Սարգսյանն ապրիլի 29-ին մեկնել է Չինաստան` մասնակցելու "Շանհայ-Էքսպո-2010" համաշխարհային ցուցահանդեսի բացման արարողությանը:

Ապրիլի 30-ին ՀՀ Նախագահ Սերժ Սարգսյանի մասնակցությամբ տեղի է ունեցել "Շանհայ Էքսպո 2010" միջազգային ցուցահանդեսում Հայաստանի տաղավարի բացման հանդիսավոր արարողությունը:

Այնուհետեւ Նախագահ Սերժ Սարգսյանը շրջել է "Շանհայ Էքսպո 2010"-ում ԱՄՆ-ի, Ռուսաստանի եւ Չինաստանի տաղավարներով:

Նախագահ Սերժ Սարգսյանի գլխավորած պատվիրակությունը մայիսի 1-ին եղել է Չինաստանի Ցզյանսու նահանգի Սուչժոու քաղաքում:

Չինաստանի երկրորդ խոշոր արդյունաբերական քաղաքում Նախագահ Սերժ Սարգսյանն այցելել է "Սուչժոու տեխնոպարկ", որը հանդիսանում է Չինաստանի եւ Սինգապուրի համատեղ նախագիծ եւ երեսուն տարում Սուչժոու քաղաքը վերածել է ժամանակակից արդյունաբերական մեգապոլիսի:

Հանրապետության ղեկավարը Սուչժոու տեխնոպարկում եղել է խոշորագույն ձեռնարկություններից մեկում` "HIGER" ավտոբուսների գործարանում: Նախագահ Սերժ Սարգսյանին դիմավորել են Սուչժոուի փոխքաղաքապետ Ժաո Վեյչանն ու "HIGER" կորպորացիայի գլխավոր տնօրեն Վու Վենմենը:

Նախագահ Սերժ Սարգսյանը շրջել է "HIGER" գործարանի տարածքում, ծանոթացել արտադրական գործընթացին:

Վու Վենմենի խոսքով` չինական ավտոարտադրության առաջատարներից մեկը հանդիսացող "HIGER" ավտոբուսների գործարանը մտադիր է հայկական շուկայում գործունեություն ծավալել` Հայաստանի հետ համագործակցության նոր հորիզոններ բացելով:

Այնուհետեւ Նախագահ Սերժ Սարգսյանն այցելել է Սուչժոուի գիտությունների, մշակույթի եւ արվեստի կենտրոն, որտեղ շրջայց է կատարել եւ ծանոթացել կենտրոնի տարածքում կազմակերպված թանգարանի ցուցանմուշներին: Շրջայցից հետո Նախագահ Սերժ Սարգսյանի գլխավորած պատվիրակությունը նավով զբոսնել է Ձինձի լճի վրա, որը շրջապատված է Սուչժոու տեխնոպարկի սահմաններում գտնվող արտադրական ենթակառուցվածքներով:

Նախագահ Սերժ Սարգսյանը նաեւ հանդիպում է ունեցել Սուչժոուի քաղաքապետ Յան Լիի հետ: Սուչժոուի քաղաքապետը ներկայացրել է քաղաքի ձեռքբերումները եւ երկկողմ հարաբերությունների հաստատման եւ զարգացման պատրաստակամություն հայտնել:

Հանրապետության ղեկավարը շնորհակալություն է հայտնել ջերմ ընդունելության համար եւ կարեւորել Հայաստանի ու Չինաստանի քաղաքական հարաբերությունների ամրապնդումը տնտեսական կապերով:

Նախագահ Սերժ Սարգսյանը Չինաստան կատարած այցի շրջանակում մայիսի 2-ին հանդիպել է Չինաստանի Ժողովրդական Հանրապետության Նախագահ Հու Ձինթաոյի հետ:

ՀՀ Նախագահը շնորհակալություն է հայտնել Հու Ձինթաոյին` "Շանհայ Էքսպո 2010"-ի բացման արարողությանը ներկա գտնվելու հրավերի համար եւ շնորհավորել ցուցահանդեսի հաջող մեկնարկի առթիվ:

Նախագահ Սարգսյանն ասել է, որ Չինաստանի հետ հարաբերությունների զարգացումը ՀՀ արտաքին քաղաքականության առաջնահերթություններից է եւ նշել, որ երկկողմ կապերն արդեն իսկ ընդլայնման լավ դինամիկա ունեն: ՀՀ Նախագահն ընդգծել է, որ բարձր մակարդակի քաղաքական երկխոսությունը, հասարակական-քաղաքական, տնտեսական, մշակութային եւ կրթական բնագավառում աշխույժ համագործակցությունը, բազմակողմ ձեւաչափերում փոխադաձ աջակցությունը նպաստում են Հայաստանի եւ Չինաստանի միջեւ փոխըմբռնմանը եւ վստահության մեծացմանը:

Կողմերը գոհունակությամբ արձանագրել են, որ էներգետիկայի, քիմիական արդյունաբերության, գյուղատնտեսության, գիտության եւ տեխնիկայի, պաշտպանության, մշակույթի եւ կրթության բնագավառներում բազմաթիվ համատեղ նախագծեր իրականացվել են մեծ հաջողությամբ: Սերժ Սարգսյանն ու Հու Ձինթաոն հայ-չինական համագործակցության մինչ այժմ կուտակած մեծ փորձը լավ հիմք են համարել` որակական նոր աստիճանի բարձրացնելու երկկողմ հարաբերությունները:

Նախագահները քննարկել են Հայաստան-Իրան երկաթուղու կառուցմանը Չինաստանի մասնակցության հարցերը: Կողմերն ընդգծել են, որ ՉԺՀ Շանսի նահանգում հայ-չինական "Շանսի-Նաիրիտ" համատեղ ձեռնարկության գործարկումը երկկողմ կապերի զարգացման կարեւոր վկայություն է:

Հայաստանի եւ Չինաստանի նախագահները վստահեցրել են, որ պատրաստ են լրացուցիչ ջանքեր ներդնել հայ-չինական բարեկամական հարաբերություններն ընդլայնելու գործում:

Նախագահ Սերժ Սարգսյանը մայիսի 2-ին իր կեցավայրում ընդունել է «Հուավեյ» (Huawei Technologies Co. Ltd) կորպորացիայի գործադիր տնօրեն Լին Րուի Չիին: Օրվա երկրորդ կեսին հայկական պատվիրակությունը` Նախագահի գլխավորությամբ այցելել է «ZTE» (Zhong Xing Telecommunication Equipment Company Limited) կորպորացիայի շտաբ-բնակարան եւ հանդիպել կորպորացիայի նախագահ Լիրոն Շիի հետ:

Այս երկու ընկերությունները, որ մասնագիտացած են հեռահաղորդակցության ոլորտի մի շարք ճյուղերում` սարքավորումների արտադրություն, էլեկտրոնային կառավարում, հեռաղարդակցական համակարգեր և այլն, մտադիր են մասնակցել Հայաստանի հեռուստահաղորդակցության ոլորտում իրականացվելիք հավակնոտ ծրագրերին:

Նախագահ Սարգսյանը եւ ZTE ընկերության ղեկավարը քննարկել են համագործակցության հնարավորությունները: Դրական վերաբերելով չինական ընկերության` Հայաստանում գործունեություն ծավալելու հետաքրքրությանը, Նախագահ Սարգսյանը միաժամանակ նշել է, որ հայկական կողմը պատրաստ է աջակցելու չինական ընկերություններին և ցանկություն ունի մասնակցել նաև արտադրական պրոցեսին:

Նախագահ Սարգսյանը «Հուավեյ» ընկերության ղեկավարի հետ եւս քննարկել է համագործակցության հեռանկարը: «Հուավեյ» -ը դինամիկ զարգացող ընկերություն է եւ ներկայումս հեղինակային արտոնագրերի քանակով աշխարհում զիջում է միայն «Ինտել»-ին, իսկ իրացման ծավալներով` «Էրիքսոնին»: «Հուավեյ»-ը մտադիր է հեռահաղորդակցական տեխնոլոգիաների համաշխարհային շուկայում առաջիկա 3 տարիներին դուրս գալ առաջին տեղը: Այդ նպատակի իրագործման համար չինական ընկերությունը հետաքրքրված է գործունեություն ծավալել նաև Հայաստանում: Քննարկումների արդյունքում հայկական կողմը համագործակցության մտադրությունների մասին հուշագիր է ստորագրել «Հուավեյ» ընկերության հետ:

Նախագահ Սերժ Սարգսյանը Շանսի նահանգի Դաթուն քաղաքում մայիսի 3-ին ներկա է գտնվել հայ-չինական տնտեսական համագործակցության ամենախոշոր նախագծերից մեկի` քլորոպրենային կաուչուկի արտադրության "Շանսի-Նաիրիտ" համատեղ ձեռնարկության բացման հանդիսավոր արարողությանը:

"Շանսի-Նաիրիտ" համատեղ ձեռնարկությունը ստեղծվել է "Շանսիի սինթետիկ կաուչուկների խմբային բաժնետիրական ընկերության" (ՉԺՀ) եւ "Նաիրիտ" ՓԲԸ (ՀՀ) միջեւ 2003թ. կնքված պայմանագրի հիման վրա: "Շանսի-Նաիրիտ"-ում հայկական կողմի բաժնեմասը կազմում է 40 %:

Նախագահ Սերժ Սարգսյանը հանդիպել է նաեւ Շանսիի նահանգապետ Վան Ցզյունին: Քննարկվել են այս նահանգի հետ համագործակցության ընդլայնման հեռանկարներին առնչվող հարցեր: