Նախագահ Վահագն Խաչատուրյանի աշխատանքային այցը Գյումրի

Հանրապետության նախագահ Վահագն Խաչատուրյանն այսօր ներկա է գտնվել «Հայաստան» համահայկական հիմնադրամի կողմից Գյումրիի «Մուշ-2» թաղամասում կառուցված երկու բնակելի շենքերի պաշտոնական բացման արարողությանը: Բացման արարողությանը ներկա են եղել «Հայաստան» հիմնադրամի գործադիր տնօրեն Հայկակ Արշամյանը, ՀՀ աշխատանքի և սոցիալական հարցերի նախարար Նարեկ Մկրտչյանը, ՀՀ տարածքային կառավարման և ենթակառուցվածքների նախարար Գնել Սանոսյանը, Շիրակի մարզպետ Նազելի Բաղդասարյանը, Գյումրու քաղաքապետ Վարդգես Սամսոնյանը և այլ պաշտոնատար անձինք:

«Մուշ-2» թաղամասում կառուցված երկու բազմաբնակարան շենքերը նախատեսված են 36 ընտանիքի համար, ևս երկու շենք կառուցման փուլում է: Բնակարանային համալիրում կառուցվել է նաև մանկապարտեզ, իսկ շենքերի ձեղնահարկերում կգործեն արհեստանոցներ:

Նախագահ Խաչատուրյանը ողջունել է ներկաներին և նշել.

«Նախ շնորհավորում եմ բոլորիս այսօրվա կապակցությամբ: Ինչպես ասում են կյանքը շարունակվում է: Այնպես եղավ, որ այսօրվա այս գեղեցիկ միջոցառումը համընկավ մեր հերթական խնդիրների հետ, բայց մենք որոշեցինք չհետաձգել այն: Շատերին կթվա, որ մենք խնդիրներ ունենք, ինչու այդ խնդիրներով չենք զբաղվում, բայց գիտեք, եթե սկսենք խնդիրներին առաջնահերթություններ տալ, այդպես էլ չենք կարող ասել, թե առաջինը որն է: 1988 թվականի երկրաշարժից հետո մեզ համար առաջինը միշտ եղել է երկրաշարժի հետևանքները վերացնելը: Եվ հիմա տեսնում ենք, թե քանի տարի է անցել, տասնամյակներ են անցել, բայց դեռևս, ցավոք սրտի, մինչև վերջ չենք կարողացել վերացնել հետևանքները: Սակայն համոզված եմ, որ դրա վերջն արդեն եկել է:

Դուք այդ միջավայրում եք ապրում և տեսնում եք, որ պետությունն իսկապես ամեն ինչ անում է, որ մենք երկրաշարժի հետևանքները չունենանք և մարդիկ, ովքեր տուժել են երկրաշարժից վերջապես կարողանան ստանալ այն, ինչին արժանի են, վերականգնեն կորուստները, որոնք ունեցել են:

Այսօրվա այս բնակարանամուտը հենց դրան է նվիրված: Այն մի փոքր յուրահատուկ է: Յուրահատուկ է նրանով, որ մարդիկ, ովքեր կմտնեն այսօր իրենց բնակարան ամեն ինչ կունենան: Երբ Հայաստան հիմնադրամում քննարկում է եղել և որոշում է կայացվել, որ գիտեք՝ մարդիկ կարիք ունեն, բնակարանը ստանան, դատարկ պատեր, իսկ հետո ինչ են անելու և պետք է դիմել տեղական իշխանություններին, բարերարներին, բարեգործներին, քանի որ օգնության անհրաժեշտություն կա: Կարծում եմ, որ սա շատ ճիշտ նախաձեռնություն է և մարդիկ կարող են ուղղակի մտնել տուն և ապրել այնտեղ:

Ուզում եմ շնորհակալություն հայտնել բոլոր այն մարդկանց, ովքեր մասնակցել են այս շենքի կառուցման գործին:

Համոզված եմ, որ այստեղ ապրող քաղաքացիները իսկապես իրենց հետագա կյանքում մեծ ներդրում կունենան Հայաստանի կայացման համար: Վստահ եղեք, որ Հայաստանի իշխանություններն ամեն ինչ անում են, որ մենք ավելի բարեկեցիկ ապրենք, ամեն ինչ անում են, որ մենք ավելի անվտանգ երկրում ապրենք և այսօր էլ ամեն ինչ անում են, որ մեր հայրենակիցները, ովքեր գտնվում են Արցախում, կարողանան իրենց անվտանգ զգան: Այդ դժվարությունները հաղթահարվելու են, բայց դրանք մենք պետք է հաղթահարենք միասին: Շնորհավորում եմ բոլոր նրանց ովքեր այսօր նոր բնակարաններ են մուտք գործելու»: 

***

Հանրապետության նախագահ Վահագն Խաչատուրյանն աշխատանքային խորհրդակցություն է ունեցել Շիրակի մարզպետարանում՝ Շիրակի մարզպետ Նազելի Բաղդասարյանի, Գյումրիի քաղաքապետ Վարդգես Սամսոնյանի, Տարածքային կառավարման և ենթակառուցվածքների նախարար Գնել Սանոսյանի և «Հայաստան» համահայկական հիմնադրամի գործադիր տնօրեն Հայկակ Արշամյանի հետ:

Մարզպետ Նազելի Բաղդասարյանն ու քաղաքապետ Վարդգես Սամսոնյանը նախագահին են ներկայացրել Գյումրիում և Շիրակի մարզի այլ համայնքներում անցնող տարվա ընթացքում իրականցված բնակարանաշինական, բարեկարգման և մարզային ենթակառուցվածքներում իրականացված ծրագրերի արդյունքներն ու ընթացիկ վիճակը:

Տարածքային կառավարման և ենթակառուցվածքների նախարար Գնել Սանոսյանը նախագահին է զեկուցել գալիք տարվա սուբվենցիոն և ճանապարհային ենթակառուցվածքներում նախատեսվող ծրագրերի՝ մասնավորապես Հյուսիս-Հարավ մայրուղու և միջհամայնքային ճանապարհների կառուցման և հիմնանորոգման նախագծերի մանրամասները:

Համահայկական հիմնադրամի գործադիր տնօրեն Հայկակ Արշամյանը նախագահին է ներկայացրել հիմնադրամի կողմից արդեն իսկ կատարված և ընթացքի մեջ գտնվող ծրագրերն ու դրանց վերաբերյալ մանրամասները:

Խորհրդակցության ընթացքում քննարկվել են Շիրակի մարզի և Գյումրիի մի շարք խնդիրներ և դրանց լուծման ուղիները՝ մասնավորապես Նազելի Բաղդասարյանն ու Վարդգես Սամսոնյանն անդրադարձել են Գյումրիում պատկերասրահ և համերգասրահ ունենալու հարցին:

«Առնվազն տարօրինակ է, որ մշակութային մայրաքաղաք հռչակված Գյումրին չունի ոչ պատկերասրահ, ոչ համերգասրահ և արդյունքում երկրաշարժից հետո Գյումրու պատկերասրահի մշակութային ժառանգությունը գտնվում է Ազգային պատկերասրահի նկուղներում ու պահոցներում և դրանով իսկ ֆիզիկապես վտանգված է»,- նշել է Շիրակի մարզպետը:

Քննարկման ընթացքում նախագահ Վահագն Խաչատուրյանը պատրաստակամություն է հայտնել հնարավորինս աջակցել Շիրակում մշակութային և հնարային կյանքի աշխուժացմանն ուղղված ինչպես տեղական ինքնակառավարման մարմինների այնպես էլ բարեգործական հիմնադրամների կողմից եկող նախաձեռնություններին և ծրագրերին:

«Մենք Գյումրիին և Շիրակին պետք է նայենք շատ ավելի լայն հեռանկարում, որպես մեր Հյուսիսային դարպասի, որպես տնտեսական ու հաղորդակցային կարևորագույն հանգույցի և իհարկե, ակտիվ մշակութային կենտրոնի տեսանկյուններից և ջանք չպետք է խնայենք, որպեսզի ներկայումս արդեն իսկ ակնհայտ վերափոխվող Գյումրին էլ ավելի զարգանա ու ծաղկի, վերստանալով իր նախկին դերն ու նշանակությունը»,- ընդգծել է նախագահը: