Շնորհավորական
Նախագահ Սարգսյանը շնորհավորական ուղերձ է հղել տիկին Լուիզ Սիմոն Մանուկյանին
Նախագահ Արմեն Սարգսյանը շնորհավորական ուղերձ է հղել «Հայաստան» համահայկական հիմնադրամի հոգաբարձուների խորհրդի պատվավոր անդամ, բարերար տիկին Լուիզ Սիմոն Մանուկյանին՝ ծննդյան 85-ամյակի առթիվ ։
Ուղերձում ասված է․
«Հարգելի տիկին Մանուկյան Սիմոն,
Սիրելի Լուիզ,
Ջերմորեն շնորհավորում եմ Ձեզ ծննդյան տարեդարձի առթիվ:
Դուք հայ իրականության մեջ գոյություն ունեցող բարեգործական ավանդույթների լավագույն շարունակողն եք:
Որպես «Հայաստան» համահայկական հիմնադրամի հոգաբարձուների խորհրդի անդամ՝ Դուք շարունակական ներդրում եք ունեցել հայրենիքի համար կենսական նշանակության ոլորտների զարգացման գործում:
Բարձր գնահատանքի են արժանի Ձեր ծանրակշիռ հանձնառությունները Հայկական Բարեգործական Ընդհանուր Միությունում՝ ի շահ հայության:
Ձեր ազգանվեր գործունեությունը մշտապես բարձր է գնահատվել թե՛ մայր հայրենիքում և թե՛ սփյուռքում:
Մաղթում եմ Ձեզ առողջություն և երկար տարիների երջանիկ կյանք»: