Նախագահ Սերժ Սարգսյանի շնորհավորական ուղերձը Հայաստանի պետական ազգային ակադեմիական երգչախմբի ստեղծման 75-ամյակի առթիվ

Ջերմորեն շնորհավորում եմ Հայաստանի պետական ազգային ակադեմիական երգչախմբին ստեղծման 75-ամյակի առթիվ:

Ազգային երգարվեստի երախտավորներ Թաթուլ Ալթունյանի և Արամ Տեր-Հովհաննիսյանի ղեկավարությամբ երգչախումբը դարձավ հայ երգի լավագույն մեկնողն ու տարածողը ոչ միայն Հայաստանում, այլև ամբողջ աշխարհում: 1961 թվականից ի վեր երգչախմբի ղեկը ստանձնեց Կոստանդնուպոլսից հայրենիք ներգաղթած երիտասարդ դիրիժոր Հովհաննես Չեքիջյանը, ում անունը հետագայում պսակվեց բազմաթիվ դափնիներով ու պատվավոր կոչումներով: Իր բացառիկ վարպետությամբ և անսահման նվիրումով մաեստրո Չեքիջյանը նշանավորեց երգչախմբի ոսկեդարը` նրա կենսագրությունը հարստացնելով փառավոր էջերով ու հաղթանակներով:

Անգնահատելի է երգչախմբի վաստակը հատկապես հայ հոգևոր երաժշտության, Կոմիտասի, Մակար Եկմալյանի, Քրիստափոր Կարա-Մուրզայի, Արմեն Տիգրանյանի, Արամ Խաչատրյանի, Առնո Բաբաջանյանի, Ալեքսանդր Հարությունյանի երգչախմբային ստեղծագործությունների կատարման և հանրահռչակման գործում: Բավական է նշել, որ հայրենիքից դուրս երգչախումբն ունեցել է 813 համերգ՝ իր արվեստի ուժով կախարդելով բազմահազար ունկնդիրների: Պատահական չէ, որ ի գնահատություն իր անցած փառավոր ուղու` 75-ամյա հոբելյանի նախաշեմին երգչախմբին շնորհվեց նաև «ազգային» պատվավոր կոչումը:

Սրտանց շնորհավորելով ստեղծման 75-ամյակի առթիվ` Հայաստանի պետական ազգային ակադեմիական երգչախմբին մաղթում եմ նորանոր հաջողություններ, անսպառ եռանդ և անխափան ստեղծագործական ընթացք: