Նախագահ Սարգսյանը շնորհավորական ուղերձ է հղել Ղրղզստանի Պետական անկախության օրվա կապակցությամբ

Նախագահ Սերժ Սարգսյանն այսօր շնորհավորական ուղերձ է հղել Ղրղզստանի Նախագահ Ռոզա Օթունբաեւային` Ղրղզստանի Հանրապետության Պետական անկախության օրվա կապակցությամբ:

Ուղերձում ասված է.

“Հարգելի Ռոզա Իսակի,

Ընդունեք իմ անկեղծ շնորհավորանքներն ու բարեմաղթանքները Ղրղզստանի Հանրապետության Պետական անկախության օրվա կապակցությամբ:

Վստահ եմ, որ Ղրղզստանի ղեկավարությունը, հենվելով ժողովրդի իմաստնության եւ աջակցության վրա, կշարունակի հասարակության մեջ համաձայնության ամրապնդմանը, երկրի սոցիալ-տնտեսական կայուն զարգացման ապահովմանը, Ղրղզստանի միջազգային հեղինակության հաստատմանը միտված բարեփոխումների ուղեգիծը:

Համոզված եմ, որ հայ-ղրղզական փոխգործակցության առաջընթաց զարգացման, երկկողմ համագործակցության բովանդակային համալրման ուղեգիծը համապատասխանում է մեր երկրների եւ եղբայրական ժողովուրդների արմատական շահերին:

Հարգելի Ռոզա Իսակի,

Անկեղծորեն մաղթում եմ Ձեզ քաջառողջություն եւ հաջողություններ, իսկ Ղրղզստանի ժողովրդին` խաղաղություն եւ բարօրություն”: