Արցախ
Նախագահ Սերժ Սարգսյանն աշխատանքային այցով մեկնել է ԼՂՀ
Նախագահ Սերժ Սարգսյանը հոկտեմբերի 21-ին հերթական երկօրյա աշխատանքային այցով մեկնել է մեր երկրի պաշտպանական դիրքեր եւ Լեռնային Ղարաբաղի Հանրապետություն:
ԼՂՀ Նախագահ Բակո Սահակյանի, ՀՀ պաշտպանության նախարար Սեյրան Օհանյանի, բարձրաստիճան սպայակազմի ներկայացուցիչների ուղեկցությամբ Նախագահ Սերժ Սարգսյանն այցելել է պաշտպանական դիրքեր, տեղում ծանոթացել զինված ուժերի մարտական պատրաստությանը, բանակաշինության ընթացիկ աշխատանքներին:
Նախագահը մասնակցել է Արցախի պաշտպանական բանակի սպայակազմի համար կառուցված նոր շենքի բնակարանամուտի արարողությանը, զրուցել զինծառայողների ընտանիքների անդամների հետ, ապա շրջայց է կատարել ժամանակակից պայմաններին համապատասխան վերակառուցված եւ կահավորված հրետանու տեխնիկական ապահովման եւ սպասարկման կետերից մեկում:
Նախագահ Սերժ Սարգսյանը զինված ուժերի բարձրագույն սպայական կազմի մասնակցությամբ երեկոյան Ստեփանակերտում հրավիրել է ավանդական խորհրդակցություն:
***
Շարունակվում է Հայաստանի Հանրապետության Նախագահ, Զինված ուժերի գերագույն գլխավոր հրամանատար Սերժ Սարգսյանի աշխատանքային այցը մեր երկրի պաշտպանական դիրքեր եւ Լեռնային Ղարաբաղի Հանրապետություն:
Նախագահ Սարգսյանն այսօր ԼՂՀ Նախագահ Բակո Սահակյանի, ՀՀ պաշտպանության նախարար Սեյրան Օհանյանի եւ հայկական զինուժի բարձրագույն սպայակազմի ներկայացուցիչների ուղեկցությամբ այցելել է բանակային բնագծերից մեկը: Հանրապետության Նախագահը տեղում հետեւել է մարտական հերթապահության ծառայության կազմակերպմանը, ներկա է գտնվել երկու գումարտակներում անցկացված ցուցադրական զորավարժություններին, անցկացրել պաշտպանական շրջանի դիտարկում: Այնուհետեւ պաշտպանության նախարար Սեյրան Օհանյանն ամփոփել է ցուցադրական զորավարժությունների արդյունքները եւ զորավարժություններին մասնակից սպայակազմին տվել համապատասխան ցուցումներ:
Նախագահ Սերժ Սարգսյանը զորավարժությունների ավարտից հետո ծաղիկներ է դրել ՀՀ ազգային հերոս Մոնթե Մելքոնյանի (Ավո) հուշարձանին:
Նախագահը պատասխանել է նաեւ Արցախի հանրային հեռուստատեսության լրագրողի հարցերին:
Այցի ավարտին Նախագահ Սարգսյանը ԼՂՀ ղեկավարության մասնակցությամբ Ստեփանակերտում հրավիրել է Արցախի սոցիալ-տնտեսական զարգացման խնդիրների շուրջ խորհրդակցություն: