Նախագահ Սերժ Սարգսյանը այցելել է Տ.Պետրոսյանի անվան շախմատի տուն

Նախագահ Սերժ Սարգսյանն այսօր այցելել է Տիգրան Պետրոսյանի անվան շախմատի տուն՝ հետևել ս.թ. հունիսի 4-ին մեկնարկած Եվրոպայի շախմատի վետերանների 16-րդ առաջնության 7-րդ տուրի հանդիպումներին:

Հայաստանում Եվրոպայի առաջնությունն անցկացվում է երկու տարիքային խմբերում՝ 50-ից մինչև 65 տարեկանների և 65 տարեկաններ ու բարձր: Մրցաշարն ընթանում է շվեյցարական մրցակարգով և տևելու է ինը օր: Այս տարի մրցաշարին մասնակցում են 18 երկրների շուրջ 100 շախմատիստներ: Հայաստանյան մրցաշարի մասնակիցների թվում են 10 գրոսմայստեր և 10 միջազգային վարպետ, ինչպես նաև 3 կին գրոսմայստեր ու միջազգային վարպետ: Եվրոպայի առաջնությանը մասնակցում են նաև աշխարհի 5-րդ չեմպիոնուհի Նոնա Գափրինդաշվիլին և հայկական շախմատի լեգենդ Ռաֆայել Վահանյանը: